“Mbele waɗooɓe seppooji caggal leydi ɓe ngam hollitde wonnde binnditaagol ngol moƴƴaani ko moritaninaɓe?”e wiyde hooreejo leydi Moritani.
Yimɓe ene cabbino e Mohammed Wull Abdel Asiis, hooreejo leydi ndii, e binnditaagol ngol no feewi haŋki aljumaa 5 aout e hitannde 2011 sanŋga nde o mawninta duuɓi ɗiɗi ko ari e jappere lamu. Gila binnditaagol ngol fuɗɗi haalaaji bonnɗi kalaama heen.Ene wiy wonnde safalɓe ko yiɗɓe ustude ɓaleeɓe Moritani e ko nanndi heen. Ɗum waɗi lanndaaji e pelle keeriide keewɗe mbiy ko yo binnditaagol ngol dartine.

Sanŋga nde Asiss, naamdaa ko yowitii, ɗe ɗoo caɗeele kala, sabu o meeɗaa haalde ko yowitii heen gila ɗum fuɗɗii. O waɗi ɗum ko bolle puuyɗe.

Asiis wiy:” miin mbiyaani binnmditaagol. Miin biy ko mooftugol kayitaaji. Fooyre Moritaninaajo kala ene foti anndeede, kayitaji mum mooftee. Ko jiɗnaaɓe poti winnditaade caggal ɗum sukaaɓe. Mo jiɗnaaɗe mum nguraani yo haal. Miin keñaaki e binnditaagol ngol. So yiɗi yo waɗ duuɓi 20. Hol sababu e miin keño? Miin nani wonnde moritaninaaɓe wonnɓe caggal leydi ɓe baɗi seppooji to leydi France ko fewte e binditaagol ngol. Mbele ni ko ɓe Moritaninaɓe? Wiyaa ko ɓaleeɓe ene keedee.

To kayhayɗi ko winnditiiɓe toon ɓe ɓuri heewde winnditiiɓe to Nema, e te ko Nema ɓuri heewde yimɓe. Kayhaɗi ko ujunnaaje 4000 yimɓe, Nema ko ujunnaaje 2000”

E teskuya, Asiis wiy ko wonaa binnditaagol kono so tawi o mo haala o wiyata tan ko binnditaagol. Ndaw ko haawni. Laaɓii wonnde ko Mohammed Wull Abde Asiis, yamiri ko naamndete e binnditaagol ko, yo naamnde.

So tawi wonaa ɗum, hol no hooreejo leydi haaldirtah nih, e ɓiɗɓe leydi jogiiɓe ngoƴaaji mawɗi e ngol ɗo binnditaagol? E te mbele ene laaɓi Asiis wonnde ko hoɗɓe Nema ɓuri heewde e hoɗɓe kayhayɗi?

To bange maccungaagu e kaltidgol lamu ngu e luulndiiɓe ɓee!

Ɗo, kadi , ɓerɗe taƴi. To baŋnge maccungaagu, o wiy ko alaa e Moritani. Ko e hakillaaji ɗi heddi. Kanko o yiyaani njiyaagu e leydi ndi. E te, fedde IRA nde e gardugol Biran Wul Abeid wonaa hebtinaande. Kadi eɓe ɓurti. “Gooto kala wi’ata ko ene waɗa kuule mum. Miin jaɓataa ɗum”, e wiyde Asiis.

To baŋnge kaaltidgol laamu nguu, e luulndiiɓe ɓee, o wiy ko haaltitde e Moritaninaaɓe ɓuri fof. Ɗo kadi laaɓi wonnde hakkunde makko e luulndiiɓe ɓee haa hannde eɓe jokki waɗdude peɗeeli e gite. Haa mande? Ko niɓɓere kunus. Hol to laamu Asiis huccini Moritani? Moftanen ko ɓooyi.

Mammadu Demmba Sih, yaakaare.com