Sikke Alaa, ko heɓi Tunisii, Ejipt, Yemen e Libi koo woppataa leydi Aarabeeri ɓurndi tameede laamu e ɗii duuɓi cappanɗe joyi: ndiin leydi woni Siriya. Kono gila pilñitanɗe nduppitii e leyɗeele Aarabeeɓe ɗee, ena hulanoo maa ar ñalawma nde dille ndiili e Siriya walla Jordaniya. Ko e lewru Colte nduu dille teppe puɗɗii yerɓinde laamu El-Asaad kono hay so dille teppe e tedda-paɗe en keewii, hay gooto sooynaaki tawi ñalngu ndu laamu nguu yahrata caggal saka nih ena jaɓa ñawndude goytaali e naamnditte ɓasngu leydi ndii.

So en njiɗii faamnde ummandere siriyanaaɓe e ɗii lebbi, alaa e sago mbaasen tan haaɗde e ko joli to Tunisii e Ejipt koo. Ɗaɗi mayre ɓuri ɗum woɗɗude. Ɗii duuɓi cappaɗe nayi ɓennuɗi, Siriya ko ko tamaa junngo njamndi e juuɗe leñol Baas en. Gila ndeen kala nde daande ummii inni demokaraasii walla ko nanndi heen, ko ɗoon soƴƴetee gila nanaaka. Caggal nde Hafes El-Asaad saŋkii, o woppidi laamu ko ɓiyi makko woni hannde Basaar, jooɗiiɗo e jappeere gila ndeen. E leydi ndii, hay daande meeɗaa ummaade ngam salaade ndonu laamu hakkunde ɓiɗɗo e baaba mum sabu ɗum wayi ko hono aada nih e yoga e leyɗeele Aarabeeɓe!

Yanti heen kadi diiwaan oo wonaa deeƴɗo no feewi sabu Israel wontande leyɗeele Aaraabeeɓe ɗee uure e teppere! Doole kala kuccinaa ko e yiɗde surde Israel e boomde leydi ndii sabu hettere mande e leydi Siriya wiyeteende Golaan ena hannde e tamre dowla Yahuudu en. Ko ɗum waɗi ɗii duuɓi cappanɗe, laamuuji ngoƴaa tan ko no Alla surani ɗum'en e bone Israel, ɓesngu ɗeen leyɗeele kala ngonndi ko e laamɓe mum'en dariiɓe ena cirŋinanii suro Israel. Ngati ɗiin yontaaji hay gooto ummotaako wiya ena sontoo laamu sabu ka kayru surata ɓeynguuji Aarabeeɓe e bone Israel. Hol ko waɗi ɗiin yontaaji natti?

Ibraahiima SAAR