edde Citoyennes & Citoyens Debout juɓɓinii ñalɗi « Caalel ngenndiyanke» ngam hokkude sukaaɓe Sebkha e Elmina waawde yeewtidde e suɓaaɓe laamu kominaaji ɗiin nokkuuji ngam yiilaade heen ɓamtaare renndaande.Ngaal dental ganndiraangal « Caalel ngenndiyanke » renndinnoo ko sukaaɓe worɓe 53 e rewɓe 22 to Nuwaasoot arɓe yeewtidde e sukaaɓe laamu (elus) mumrn. Ko ɓuri heede e ɓeen sukaaɓe ngiwi ko e duɗal jaaɓi haaɗtirde Nuwaasoot, pelle sukaaɓe e rewɓe  gonɗe e nder Sebkha e Elmina.

Dental ngal toɗɗinoo ko fammin’de e hirjin’de cukaagu ɗiin kominaaji gollal laamu komiin mumen e nder doosɗe potal demokrasii, kono kadi ngam faamde njeyaandi e ndewaandi e darnde waɗɗiinde cukaangu ngu e nder ɓamtaare nguurndam ɗiin nokkuuji.

Ardiiɓe laamu ɗiin kominaaji ngariino toon ngam yeewtidde e sukaaɓe arnooɓe toon. Ina jeyaa e arnooɓe toon Raabi Aydara (meer Sebkha), Saar (cukko gardiiɗo meeri Elmina). Laamu dowru kadi ariino toon ; ina heen, Lalla Mint Hacena, Malouma mint Meyddah, Nana mint Cheikha e Kan Haamiidu Baaba.

Nguurndam kominaaji ɗi, nguurndam renndo fof e caɗeele mum, hakkeeji aadee, darnde cukaagu e nder ɓamtaare renndo ngo haalaama toon. Laamɓe arnooɓe toon, mo woni fof yeewtii heen ngam hokkude heen miijo mum.

Citoyennes & Citoyens Debout waɗiino hirjino to Hotel Kummbi Saleh ñande 19 Fewriyee ngam hirjin’de ndee yeewtre hakkunde sukaaɓe kominaaji mum e suɓiiɓe ɗum en. E ciftoor hono ɗee dente mbeeɓaani e dente men, sabu suɓaaɓe yoo ngardo komiin wolla yoo ngon depiteeji e senaateeruuji keewaani jokkoondirde e suɓɓe ɗum en so wonaa nde wooteeji njonti. E siftin’de kadi, fedde Citoyennes & Citoyens Debout, ko fedde nde wonaa laamuyankore jooɗiinde to Nuwaasoot.

Binndol Umaar Tokosel Bah, Lewlewal Group Networks, www.mbiimi.com e ballal Madiina Accee

Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men.

Umaar Tokosel Bah

source : Mbiimi.com