Hanki, 9 maaris 2011, laamɗo leydi Maruk, hono Muhammed VI, habrii ko himmi no feewi wonande leydi mum, so fellitde waylude Doosɗe leydi mum, mbayliigu kuuftodinngu. Fayndaare nguun mbayliigu ko ɓeydude mbaawka gardiiɗo hilifaaɓe (premier ministre) kam e heertooji dawrugol (partiiji politik). Goomu toɗɗaama ngam sakkitde miijo ɗoo e lewru suwee.

Caggal ɗuum, so eɓɓaande Doosɗe kese lelnaama, woote diisnorɗe (referaandoom) njuɓɓinee. Muhammed VI limtii ko ina wona toɓɓe jeeɗiɗi gorwore ɗe mbayliigu nguu potata fawaade, ina jeyaa heen keptingol e nder doosɗe leydi he goodaangal leñol « amasik » (amazigh), kam e ɓeydugol mbaawka gardiiɗo hilifaaɓe, kam e sompude ñaawoore rimɗunde.  O haalii heen kadi tiiɗtingol darnde partiiji politik.

Kaaɗoo haala, ina holliti wonde laamɗo Maruk, yolbinii ginol laamu mum, faamii wonde waklitere jibinaande Tuunus nde, woorataa leydi mum, ɗum noon, iditaade ɓuri, sibu ko ɗum danndata mo, danndata leydi makko e jiiɓru e kareeli. Waawi jogaade ngalɗoo cuusal tan ko neɗɗo kakkilɗo, ngenndiyanke.

Hannde, yimɓe fof ina kawri wonde haala Muhammed VI ka, ko haala teskateeka ; kala joginooɓe yaakaare, ina wayi no njogoraani areede aaccere, laamɗo Maruk sooynaani jikke.

Eɗen ciftina wonde seppooji puɗɗinooma yuɓɓineede e leydi he ñalnde 20 e 26 feebariyee e yoga e gure Maruk ngam ɗaɓɓude mbayliigaaji. Ina wayi no, ɗaɓɓaande maɓɓe nanaama, jaabaama.

FBP