Fedde Dental Leyɗeele (ONU) weddiima eeraango mawngo fayde e hohooɓe winndere ngam ɗaɓɓude ballal fayde e ujunneeje neɗɗo wonnooɓe e Libi, yiɗɓe hannde dogde hareeji hakkunde wonndiiɓe Khadafi e haɓdiiɓe mum. Gila filñitaare ndee fuɗɗii e Libi, heewɓe e gollotonooɓe e leydi ndii puɗɗiima faayde kisal mum'en haa teeŋti e arani'en ɓe leyɗeele mum'en ngalaa doole ngam yuɓɓinde kootol mum'en jaajtingol. Farayse, Dowlaaji Dentuɗi, e yoga e leyɗeele Orop galɗuɗe ndognii ɓiyɓe leyɗeele mum'en gila dille ɗee puɗɗii e wuro Benghasii. Kono hannde doole e arani'en ɓee ko toobɓe hakkunde Tunisii e Libi etee kulol mawngol ena woodani hohooɓe ONU e kisal maɓɓe.

Fedde ONU halfinaade mooliiɓe (HCR) hollitii wonde weeyo ngoo ena boni no feewi to keerol hakkunde leyɗeele ɗee ɗiɗi sabu ko ɓuri cappanɗe nay ujunere neɗɗo nana jookii to bannge Libi ngam yiɗde yaltude leydi ndii. Ko ɓuri heewde e maɓɓe ko Ejiptnaaɓe, kono kadi ena waɗi Asiinaaɓe e ɓaleeɓe ummiiɓe Afrik. Yoga e maɓɓe paayi ko laamu Libi joopii arani'en sabu mum'en tuumeede ko kañum'en nguttata jaynge fitina e nder leydi Libi. Ejiptnaaɓe mbiyaa ko filñitaare mum'en saabii hannde ko Libi woni e dow mum koo. Ko ɓuri hulɓinaade e joopagol arani'en, ko wiyde wonde ko merseneeruuji ɓaleeɓe ummiiɓe Afrik kuutortee ngam fellude ɓiyɓe Libi. Ko ɗum waɗi hannde, wonde ɓaleejo e nder Libi ena boni sabu heewɓe e maɓɓe hannde ko suuɗiiɓe, cuusaa yaltude.

Warngooji ɓeleeɓe keewii...

Hareeji ɓeydiima kadi e ɗii waktuuji ɓennuɗi sabu haɓtaare wonndiiɓe Khadafi toɓɓude gure keɓtanooɗe gonɗe fuɗnaange Libi. Wiyaama wonde konu makko bommbii yoga dartorɗe filñitaare ndee ngam heftude gure ɗee. Ko ɗum ɓeydi hannde heñaare yiɗde dognude arani'en ɓe ngalaa to moolii so wonaa caggal leydi.
Afriknaaɓe heewɓe hannde ko aanɓe sabu laamuuji mum'en waasde jogaade ngalu ngam diwnude-ɓe caggal leydi. Ko ɗum waɗi ena hulaa heewɓe e maɓɓe ko jogorɓe loraade walla boomaade sabu alaa kakkitoowo! E nder Libi, heewɓe hannde cuusaa yaltude saka ena ndaaŋana keei ngam yaltude leydi ndii. Yiyaaka tawa hol dariiɗo e yiɗde danndude-ɓe. Woni yaakaare maɓɓe hannde tan ko hare ndee ñifa law tawa foolɓe ɓee ena ɗooftii kuule sariyaaji hakkundeleyɗiije.

Kuɗol Ibraahiima SAAR