estiwaal guurtingol gure ɓooyɗe leydi Moritani fuɗiima wuro Singiti gila 16 ha 22 feewriye e hitaande 2011. Milioŋaaji 60 mbadaama heen e meere.

To bannge jeewte ngurdam wuro ngo, yewtiyankooɓe ɓe, kolliti ko Singiti wiyeteno ko ABIER e kadi sosa ko gila hitande 660 caggal fergo nelaaɗo Allah mo Hammad mo jam e kisal ngoni e mum o. Kono innde Singiti nde ko gila hitande 1262, e wiyde maɓɓe. Ceerno Sidi Abdoullah Ould El Haj Brahim, kanium, holliti ko juma o, maha ko gila e hitande 1440 caggal jibineede annabi Isa. Hol mahɗo juma ka ?

Ɗoo laɓaani. Kono Haruuna Caam, gooto e annduɓe ganni Moritani, wiy ko : biyeteɗo Cheick Mohamed Namori Camara mahi juma ka ,kadi ko kanko woni imaam gadano juma ka.

Fotde yontere ngurdam wuro Singiti ngo e iwdi mum halaama. Singiti ko wuro wongo bannge rewo Mauritani fotde 70 km hakkunde mum e Attar, wuro laamorgo diwaan Adraar. E wiyde yeewtiyankooɓe e feswal o, Singiti wonno ko nokku kawtal hajjuyankooɓe feewɓe makka. Ko ɗuum saabii, e wiyde maɓɓe, wuro ngo wonti duɗal mawngal jande diine Islam. Ko e oon fannu wuro ngo wontiri tufnde pinal arabeebe e juulɓe. Ko heen innde « Bilaad Chinguitti »ummi hay Moritani ene noddire noon. ɓe mbiyi kadi ko ɗuum waɗi wuro ngo jaggiraa ko 7 ɓiwo Islam e aduna he kala.

Singiti goonga?

Caam Haruuna, gonɗo e wuro ngo fotde duubi 18, wiy ko juma Singiti ka, mahi ɗum ko Cheick Mohamed Namori Camara, kadi, ko kanko adii wonde imaam juma ka. Ko ɗuum woni goonga, e wiyde makko. O wiy,kadi, ko ɗuum winnda e defte. « Kono ɓe njiɗah ɗum haale. Mi annda hol sabaabu eɓe pena ? Mbele ɓe gannda fenaande ene harmi ? Innde adannde wuro ngo ko « Chin-guédé » e ɗemgal sooninke firti ko Woyndu pucci. So ɓe kaalii ko wona ɗum ɓe penat », e wiyde Caam Haaruna e sekre.

Ko waawi heen wonnde kala, caggal Singiti ko Woodaane, Tiisiit e Wolata, njubbinta hono oɗo festiwaal hitande kala.

Mi siftina on wonde fetde pinal windereyankoore Unesco heɓtinii Singitii, Tichitt, Ouadane, e Oualata, gila hitaande 1996,wonde ko e gure ganni de njeyaa.

Mammadou Demmba Sih,gondo e lappol yaakaare.com to Chinguitti