alawma tesketeeɗo daatol Ejipt e leyɗeele aarabeeɓe! Ko hannde waɗti balɗe sappo e jeetati filñitaare ɓesngu Ejipt fuɗɗii. Konngol ko gootol e kunuɗe teemedde ujuneere neɗɗo saliiɓe ummaade e boowal Tahriir gila ndee: Mubarak yoo yah! Kono gardiiɗo laamu Ejipt ɗii duuɓi 30 meeɗaa hollude yeeso jogorɗo tellaade e jappeere gila filñitaare ndee fuɗɗii. Kono seedaama wonde Kooniŋkooɓe leydi ndii caliima gila adan fellude ɓesngu mum'en. Ko ɗum waɗi cuusal ɓeydii e deedi sepooɓe ɓee haa oo ñalawma teskinɗo e daartol Ejipt mo Mubarak riiwaa e laamu.

Ko ñalnde Naasaande 10 Colte sikkanoo maa Mubarak woppu laamu sabu hakke miloŋ aadee hawrii e boowol Tahriir ngam naamnaade tellogol makko e jappeere! Yaakaare ñalli oo ñalawma caggal nde habraa maa Mubarak wowlu konngol e tele leydi ndii. Alaa ko ɗaminaa naneede e nduun wowlaandu so wonaa omo habra wonde o woppii laamu. Kono ɗaminaare bonii caggal nde o yalti e tele o wiyi wonde omo jogori jooɗaade e laamu haa lewru Siilto, kono o ɗaɓɓaani gorlal goɗngal ngam heddaade e hoore laamu. Ko ɓuri teskinde e kuule ɗe o ɓami ko "weeɗde doole laamu" cukko makko biyeteeɗo Umar Suleymaan.

Nduun wowlaandu saaynii ɗaminaare haa seppooɓe haŋkadi puɗɗii faayde sabu Mubarak salaade ɓosde! Kono, ena anndaa won ko fuɗɗii yerɓude e laamu makko caggal nde o habri wonde maa kuule keewɗe e sarɗiiji leydi ndii mbayle ngam nootaade njoƴaaji yontannde leydi wonnde e laabi hannde ena ceppa. Ngati Mubarak ŋatii seeɗa, wuttii seeɗa ngam etaade danndude ko heddanii-mo e laamu makko. Kono jaayndeeji winndere ndee kala kollitii wonde seppooɓe ɓee njogoraani yahrude caggal sabu ɓe paamii doole maɓɓe no poti hannde. Ko ɗum waɗi addi hokkiraa wonde yoo Keernaaɓe fof kawru hannde Mawnde 11 Colte, ñalngu diine e njuulu aljumaa, ngam haŋkadi hollude Mubarak wonde feere alanaa-mo so wonaa weeɗde jappeere laamu nguu ɓesngu Ejipt ndariingu e laabi gila ñalnde 25 Siilo.

Aadi ɓamaaɗo oo tabitii haa wooroo Alla e yimɓe heewde e boowol Tahrii ñalnde Mawnde 11. Ko ɓuri milioŋ! Sahnga nde Dhowr juulaa, habraama wonde Hosnii Mubarak ummiima Keer fayde Sharmal-Shek, takko keerol maɓɓe e Israel. Ko toon Galle Laamorgo ɗiɗaɓo oo woni. Kono jaayndeeji keewɗi mbiyi wonde ko o dogɗo! Wonaaji hojomaaji habraa wonde maa laamu yaltin bayyinaango "tiiɗngo, heñoraango" ko leelaani. Hakkillaaji fof haŋkadi ngoni ko e jaynirɗe teleeji. Ko sahnga waktuuji 16: Umar Suleymaan wowli tolbec e tele wonde "Mubarak fellitii woppude jappeere laamu..."!  E oon hojom kabaaru oo wonti diiraango wooto e boowal Tahrii: ɓesngu Ejipt ngonngu e laabi ɗee jonte tati hiinii poolgu mum, weytaare saakii e nder seppooɓe e boowal ngal. Teleeji aduna ɗii kala kuccini kameraaji mum'en to boowal ɓurngal lollude hannde e Ejipt: Tahriir...
Mubarak, gorko doonunooɗo, tamnooɗo ɓurndi doolnude e leyɗeele aarabeeɓe, tuuɗaama e laamu ngu o jooɗinoo duuɓi cappanɗe tati, ngu o ɗamininoo weeɗde ɓiyi makko Gamal Mubarak! Ɗum ena foti finndinde laamuuji mbaawgu diiŋiiɗi hannde e leyɗeele aarabeeɓe, kono kadi laamuuji ɓurɗi ɓadaade-en... Hay so mi ɗosaani-on yiytere... on paamii.

Kuɗol Ibraahiima SAAR

http://www.pulaagu.com/